Haxhinasto: Pagesa e faturave të ujit, detyrim për çdokënd

Në vijim të konferencave vjetore të veprimtarisë së institucioneve në varësi të ministrisë së Transportit dhe Infrastrukturës, ministri Haxhinasto përmbylli ditën e sotme veprimtarinë vjetore të Drejtorisë së Përgjithshme të Ujësjellës Kanalizimeve.

Kryefjala e Ministrit Haxhinasto për këtë sektor ishte partneriteti me qytetarët dhe ndërgjegjësimi i publikut për vlerësimin e ujit, si element jetik dhe aset kombëtar.

“Pjesëmarrja e publikut është pjesë e thelbësore e reformës që po ndërmarrim dhe element kyç për suksesin e saj. Duhet të ndërgjegjësohet çdo qytetar se pagesa e ujit është detyrim”, tha ai.

Duke vlerësuar si 3 çështjet dhe sfidat kryesore të këtij sektori humbjet në rrjet, konsumin e energjisë dhe kapacitetet njerëzore, si dhe theksoi si cështje prioritare për trajtim në këtë sektor mundegesën e aksesit të ujit të pijshëm në nivelin e rreth 20% të popullatës dhe mungesën e shërbimit të kanalizimeve të ujërave të përdorura në nivele nën 50% të popullatës.

Duke u ndalur në çështjen e humbjeve në rrjet, ministri Haxhinasto e theksoi humbjen në rrjet në të sistemit në tëresi me 67% si një shifër të papranueshme dhe nënvizoi se nivele të tilla humbjesh nuk mund të garantojnë një sistem të qëndrueshëm. Më tej, ai vijoi me konsumin e lartë të energjisë, i cili për 2014-ën ishte në vlerën rreth 1.8 miliardë lekë, kosto prej funksionimit me ngritje manuale në sistemin e  ujësjellësave në vend. Ai u shpreh se kapacitetet njerëzore në nivel operimi dhe menaxhimi vijojnë të jenë një nga problematikat kryesore në këtë sektor.