“Heritage Foundation” vlerëson Shqipërinë

Organizata prestigjioze ndërkombëtare  “Heritage Foundation”, bazuar në të dhënat e Bankës Botërore dhe Doing Busines, konstaton që komponenti i lirisë së punës në Shqipëri, ka pësuar një rritje në 52.9% nga 49.7%, që ishte një vit më parë.

Lajmi konfirmohet nga Inspektoriati i Punës, ku thekson se ky konkluzion pozitiv ka ardhur si rezultat i vlerësimit të disa faktorëve, që lidhen me me klimën e përmirësuar të marrëdhënieve të punës dhe respektimit të të drejtave të punëmarrësve, konform ligjit.

Zëdhënësja e Inspektoriatit të Punës, Daniela Hasani në deklaratën për mediat thekson se “kemi bindjen, që ky vlerësim pozitiv vjen edhe si rezultat i kontributit të dhënë nga Inspektorati i Punës, gjatë vitit që shkoi, për përmiresimin e marrëdhënieve të punësimit dhe kushteve të punës, duke patur qëllim dhënien e dinjitetit që i takon çdo punonjësi".

"Në këtë drejtim do të vijojmë të punojmë edhe gjatë ketij viti, duke u angazhuar në luftën kundër informalitetit në të gjitha format në të cilat ai shfaqet.

Sot permes nje udhëzimi te leshuar nga Drejtori i Pergjithshem i Inspektoriatit te Punes, Dritan Ylli, Degët Rajonale në të gjithë vendin do të nisin një kontroll për punën që kryhet në turnet e dyta dhe të treta, orët shtesë, si dhe per ditët e pushimit apo të festave zyrtare”, thuhet në njoftimin për mediat

Gjatë vitit 2014, bën me dije ISHP, rreth 35 për qind e punëmarrësve informal, janë konstatuar të punojnë në turnet e dyta dhe të treta. Përmendim rezultatet e mira që pati kontrolli i ushtruar nga inspektorët e Degës Rajonale te Tiranës në subjekte qe ushtrojne aktivitetin gjate nates, u konstatuan punëmarrës informalë dhe përvec kësaj dhe shumë shkelje të dispozitave ligjore që rregullojnë punën e kryer me turne.

“Në ato subjekte, ku do të konstatohen shkelje flagrante të ligjit, sic jane punësimi informal dhe mosderdhja e sigurimeve shoqerore per punonjësit, apo shkelje qe lidhen me kohëzgjatjen e punës dhe të pushimit dhe punën e kryer në turnin e dytë dhe të tretë, inspektoret do të marrin masa urgjente, deri në pezullimin e punës.  

Për një ndikim sa më pozitiv për përmirësimin e situatës në lidhje me marrëdhëniet apo kushtet e punës për punëmarrësit do t’ju kërkonim të gjithë subjekteve që të jenë sa më bashkëpunues”, tha ajo.