Historiania ruse: Ja misioni që Ramiz Alia i ngarkoi Sali Berishës në ’90 dhe si u ndryshua sistemi pa gjakderdhje

Historiania ruse, Nina Smirnova, në librin e saj “Historia e Shqipërisë Përgjatë Shekullit XX”, rrëfen momentet e ndryshimit të sistemit në Shqipëri në vitin 1990.

Referuar një interviste të dhënë, ajo citon Ramiz Alinë t’i ketë thënë Sali Berishës që të kontaktonte me organizatorët e grevës.

Por, sipas historianes ruse, Berisha e kishte kuptuar që misioni i ngarkuar nga Ramiz Alia do të dështonte.

Në vend të zbatimit të misionit, Sali Berisha me disa intelektualë të kohës vendosën të krijojnë Partinë Demokratike, duke shënuar kështu ndërrimin e sistemit pa gjakderdhje.

“Që kur ishte në burg në një intervistë dhënë gazetës “Koha Jonë” në maj të vitit 1995, Ramiz Alia pohonte se ishte pikërisht ai që zgjodhi kardiologun e njohur e aktivistin e organizatës së Partisë së Tiranës, Sali Berisha, për të kontaktuar me organizatorët e grevës së urisë e të mitingjeve studentore”, thotë ajo në librin për historinë shqiptare gjatë shekullit 20, raporton Sot.

Në vijim të rrëfimit për këtë pikë të historisë, Smirnova tregon vendimin e Berishës për moszbatimin e misionit të ngarkuar nga Ramiz Alia.

Ajo tregon se Berisha mblodhi disa intelektualë si Gramoz Pashkon, Neritan Cekën, Luan Omarin dhe Azem Hajdarin për t’iu komunikuar vendimin për krijimin e një partie të re, që më datë 2 dhjetor u regjistrua dhe shënoi lindjen e pluralizmit në Shqipëri, pas gati një gjysmë shekulli sundimi të regjimit të Enver Hoxhës.

“Por Berisha e kuptoi shumë shpejtë se misioni i ngarkuar qe i paracaktuar të dështonte, ndërroi kampin dhe së bashku me pedagogët e Universitetit të Tiranës e përfaqësues të tjerë të inteligjencës, krijuan partinë e rinisë e të intelektualëve, në të cilët hynë ekonomisti Gramoz Pashko, arkeologu Neritan Ceka, mjeku kardiolog Shahin Kadare, juristi Luan Omari, udhëheqësi i Lëvizjes Studentore Azem Hajdari etj.

Ky grup qe bërthama e Partisë Demokratike e drejtuar më pas nga Berisha”, shkruan historiania ruse, duke shtuar se më 2 dhjetor të vitit 1990 u regjistrua Partia Demokratike. Kjo ditë sot vlerësohet si dita e lindjes së pluralizmit politik në Shqipëri.