Ish-drejtori i Policisë së Shtetit, Mit’hat Havari, i pranishëm në protestë, tha se kryeministri Edi Rama duhet të japë dorëheqjen, ose ai parashikon një fund si të Gadafit për kreun e qeverisë. Gjatë fjalimit, ai sulmoi edhe Ramush Haradinajn, i cili në një intervistë deklaroi se i vjen turp që protestues nga Kosova kanë marrë pjesë në protestë. Sulm pati edhe për Ali Ahmetin, i cili pati dënuar protestat duke thënë se vendet fqinje duan të godasin turizmin në Shqipëri.
“Rini shqiptare, kohë më parë një person tha për ju se ju vjen erë parfum. Nuk më qëndroi mirë ajo shprehje. Juve ju vjen erë Shqipëri, lirie. Juve ju vjen erë demokraci. Djersa juaj është parfumi i sakrificës që bëni këtu çdo natë, përballë një bishe të tërbuar që nuk dorëzohet. Nuk dorëzohet, sepse ka shumë kusure mbi kurriz. Ai luan me fjalët, sepse është në ditë të vështira. Na quan ne antiamerikanë.
Besfort Lamallari deklaroi se ishte Rama ai që shkoi në Serbi dhe foli për pavarësinë e Kosovës. Lamallar, të ka përdorur sepse ti nuk guxon të flasësh pa leje. Fjalët e Ramës ishin flluska sapuni. Kosovën e çliroi vetë Kosova, me mbështetjen e Shteteve të Bashkuara të Amerikës dhe të Britanisë së Madhe. Pa ta, Kosova nuk do të ishte kurrë e lirë. Më vjen keq për dy figura politike. Ramush Haradinaj deklaroi se ”më vjen turp që jam kosovar”, duke iu referuar kosovarëve që vijnë këtu në protestë. Ne e njohim mirë historinë.
Ramush mos harro se është vëllazëria shqiptare. Mos harro! Prandaj vijnë këtu; nuk i dërgon Albin Kurti. Edhe Ali Ahmeti ishte shqetësuar. Turistët kënaqen kur shohin këtu një protestë paqësore. E ka marrë vesh e gjithë bota. Nuk ka ndodhur më parë, sepse ishim mësuar me molotovë. Ai do të përfundojë si Gadafi, nëse nuk largohet në mënyrë paqësore. Duhet të paguajë për gjithçka që ka bërë. Hajde, Kushner, ndërto një spital onkologjik, sepse populli po tmerrohet. Hajde, sipas rregullave”, tha ai.