Jorida Tabaku: Rritja e çmimeve të karburanteve, spekulim në kurriz të qytetarëve

Deputetja e Partisë Demokratike, Jorida Tabaku, ka reaguar përmes një videoje në rrjetet sociale në lidhje me rritjen e çmimeve të karburanteve në vend, duke e cilësuar situatën si rezultat të një sistemi të korruptuar ekonomik që dëmton drejtpërdrejt qytetarët shqiptarë.

Tabaku nënvizoi se, ndryshe nga Shqipëria, vendet e rajonit kanë ndërmarrë masa për të përballuar rritjen e çmimeve, ndërsa në vend qytetarëve u ofrohet vetëm propagandë.

“Rritja e çmimeve pa u reflektuar ende në bursat ndërkombëtare dhe me depozitat e mbushura është në dëm të drejtpërdrejtë të qytetarëve shqiptarë. Ky është rezultat i një sistemi të korruptuar ekonomik që ka kapur çdo hallkë të tregut, nga pikat e karburantit deri tek çmimet që paguajnë çdo ditë qytetarët”, u shpreh Tabaku.