Kadilli: Berisha mbetet kryetar i përjetshëm, por PD duhet të kthehet në ofertë dhe shpresë

Ish-deputeti i PD-së, Fatbardh Kadilli ka komentuar me tone kritike referendumin e fundit të zhvilluar në PD, i cili rikonfirmoi Sali Berishën në krye të partisë në mungesë të një gare të mirëfilltë. Kadilli e cilësoi këtë proces si një akt tërësisht formal dhe të panevojshëm, duke theksuar se Berisha do të mbetet “kryetari i përjetshëm” i asaj partie sa herë që të jetë prezent, pasi anëtarësia vitale përbëhet nga berishistët.

”Berisha e ka të vështirë të jetojë në një parti me njerëz me qëndrime të ndryshme. Nuk i përzë, por i lë në injorim, u pamundëson çdo instrument politik. Të bashkëjetosh në atë parti sot duhet të bësh garë kush e do më shumë Berishën, kush e imiton më shumë në gjestet politike, duke u bërë edhe qesharakë një pjesë e tyre. Ky ekip që është, është i pavlerë nga ana politike sa kohë nuk prodhon asgjë, përveç një shërbimi duke krijuar alibinë që nuk mund të vijojë partia pa Berishën. Nuk do të shuhet opozita se nuk është një njeri. Nuk jam dakord me ata që duan të justifikojnë servilizmin që i bëjnë Berishës, kushdo qoftë”,- tha Kadilli.

Nga ana tjetër Kadilli argumentoi se aksionet opozitare me zjarr e hekur kanë dështuar sepse PD-ja po sillet thjesht si një kundërshtar i pushtetit dhe jo si një ofertë e re që ngjall shpresë për ta zëvendësuar atë. ”PD e lufton qeverinë, por nuk mjafton ta luftosh regjimin, duhet të jesh oferta për ta zëvendësuar, të jesh shpresë për shqiptarët. Sa kohë nuk ngjall besim e shpresë, është e pamundur ta rrëzosh, sado i ashpër të sillesh në aksion. Ka bërë pafund protesta, me zjarr e hekur, nuk funksionon sepse ka dy koncepte që duhen ndarë: është një gjë të jesh kundërshtar i pushtetit dhe tjetër të jesh kandidat për ta zëvendësuar pushtetin”,-tha në ”News 24”.