Shefja e diplomacisë së Bashkimit Evropian, Kaja Kallas, ka vlerësuar ecurinë e vendeve të Ballkanit Perëndimor në procesin e integrimit evropian, duke veçuar Shqipërinë si një nga vendet që ka shënuar progres të rëndësishëm në rrugën drejt anëtarësimit në BE.
Në një intervistë për agjencinë boshnjake të lajmeve, Kallas u shpreh se zgjerimi i BE-së mbetet një prioritet strategjik dhe se ritmi i këtij procesi pritet të përshpejtohet në vitet e ardhshme. Për të Shqipëria dhe Mali i Zi janë ndër vendet për të cilat Bashkimi Evropian ka kapacitet t’i pranojë, duke nënvizuar se procesi i zgjerimit nuk duhet parë si një garë mes vendeve kandidate.
“Zgjerimi nuk është një lojë me fitues dhe humbës. Ose të gjithë janë pjesë e tij, ose askush”, deklaroi Kallas. Sipas saj, Shqipëria dhe Mali i Zi kanë bërë hapa përpara në procesin e integrimit dhe për BE-në pranimi i tyre është një objektiv i arritshëm.
“Nëse marrim si shembull Malin e Zi ose Shqipërinë, ato janë vende që Bashkimi Evropian ka kapacitetin t’i mirëpresë. Është gjithashtu e qartë se është në interesin tonë që vendet e Ballkanit Perëndimor t’i bashkohen Bashkimit Evropian. Ky është gjithmonë një proces i dyanshëm”, u shpreh ajo.