Kalaja e Krujës vijon të jetë një nga destinacionet më të rëndësishme të turizmit kulturor në Shqipëri, duke tërhequr çdo ditë vizitorë vendas dhe të huaj.
Kryeministri Edi Rama ndau mëngjesin e sotëm pamje nga “e përditshmja në Kalanë e Krujës”, ku turistë të shumtë eksplorojnë një prej siteve më të rëndësishme të trashëgimisë historike shqiptare.
E ngritur mbi një kodër shkëmbore, Kalaja e Krujës shtrihet në një sipërfaqe prej rreth 2.5 hektarësh dhe përbëhet nga mure rrethuese të përforcuara me nëntë kulla. Sipas Agjencisë Kombëtare të Turizmit, fortifikimi i saj daton në shekujt V-VI dhe gjatë periudhës së Skënderbeut u shndërrua në një nga simbolet kryesore të qëndresës shqiptare ndaj Perandorisë Osmane.
Brenda kompleksit ndodhet Muzeu Kombëtar “Gjergj Kastrioti Skënderbeu”, një nga ndalesat kryesore për vizitorët që duan të njohin historinë e Shqipërisë dhe figurën e Heroit Kombëtar.
Muzeu është organizuar në disa pavijone dhe hapësira tematike, ku përmes objekteve historike, dokumenteve, armëve, faksimileve dhe materialeve të tjera përcillet historia e Shqipërisë dhe rezistenca shqiptare në shekullin XV. Në koleksionet e muzeut përfshihen, ndër të tjera, objekte prej qeramike, bronzi, hekuri e bakri, ikona, shkrime, kambana e vitit 1462 dhe shpata origjinale të shekullit XV.
Kompleksi muzeor përfshin pavijone që trajtojnë periudha të ndryshme historike, nga Antikiteti dhe Mesjeta e Hershme, te Principatat Shqiptare, pushtimi osman dhe qëndresa shqiptare. Në të gjenden gjithashtu kancelaria e Skënderbeut, biblioteka, Salla e Princave dhe hapësira të tjera të ekspozimit.
Krahas Muzeut të Skënderbeut, brenda mureve të kalasë ndodhet edhe Muzeu Kombëtar Etnografik, i vendosur në një banesë tradicionale të familjes Toptani, të ndërtuar në vitin 1764. Muzeu pasqyron mënyrën e jetesës, zejet dhe traditat shqiptare, përmes objekteve të përdorimit të përditshëm dhe punimeve artizanale.
Vizita në kala plotësohet me Pazarin e Vjetër të Krujës, përgjatë rrugës me kalldrëm që të çon drejt kompleksit historik. Pazari është i njohur për dyqanet tradicionale dhe punimet artizanale, përfshirë punime në dru, bakër, argjend, tekstile dhe qilima.
Interesi për Krujën si destinacion i turizmit kulturor është i lidhur ngushtë me trashëgiminë e saj historike. Kalaja, muzeumet, Pazari i Vjetër dhe panorama që shtrihet mbi qytet dhe fushat përreth e bëjnë Krujën një nga pikat kryesore të itinerareve të turizmit kulturor në Shqipëri.