Kinezët në Cërrik, interes për naftën, ujësjellësin dhe bujqësinë

Qyteti i Cërrikut mund të kthehet së shpejti në një qendër të rëndësishme për investitorët kinezë.

Gjatë një vizite në të përbashkët, Ministri i Transporteve Haxhinasto dhe ambasadorja kineze në vendin tonë, kanë vlerësuar klimën e favorshme për biznesin e huaj.

“Kjo bashki ka një potencial mjaft të madh zhvillimi. Ne po diskutojmë për një bashkëpunim në të ardhmen. Me anë të këtij takimi dua të tregoj vullnetin e qeverisë kineze edhe aftësinë e kompanive kineze për të marrë pjesë në ndërtimin e ekonomisë shqiptare,” – tha ambasadorja kineze Jiang Yu.

Takimi kishte qëllim nxitjen e biznesit kinez për të investuar në bashkinë e Cërrikut.

Synohet ringritja e rafinerisë së përpunimit të naftës, si dhe investimet në rrjetin e ujësjellësit si dhe në zhvillimin e bujqësisë. Ndërkohë, Ministri Haxhinasto i shoqëruar nga Drejtori i Rrugëve ka inspektuar edhe punimet në aksin rrugor Elbasan-Cërrik-Gostimë dhe atë Papër-Cërrik.