Komisionerja Kos: Hapja e të gjithë kapitujve, provë se qeveria po bën më të mirën për shqiptarët

Komisionerja Evropiane për Zgjerimin, Marta Kos vlerëson përpjekjet e qeverisë shqiptare për ecurinë e shpejtë të vendit në hapjen e të gjithë grupkapitujve. Ajo theksoi se kjo është provë e fortë e lidershipit që bën çdo gjë që është e mundur për procesin e anëtarësimit.

“Katërshja jonë e preferuar ka bërë hapa të mëdhenj përpara dhe unë jam shumë e lumtur që vendet anëtare i njohin përpjekjet e tyre”, tha Kos duke iu referuar vendeve që kanë hapur negociatat me BE. “Shqipëria ka hapur të gjithë grupkapitujt në vetëm 13 muaj. Kjo është një provë e fortë që lidershipi po bën çdo gjë që është e mundur për procesin e pranimit dhe sigurisht një provë e fortë që qeveria po bën më të mirën për popullin e saj. Më shumë se 90% e shqiptarëve mbështesin procesin e zgjerimit”, u shpreh Kos.

Presidenca e Këshillit të Evropës miratoi sot konkluzionet sa i përket procesit të zgjerimit. Sa i përket Shqipërisë, Këshilli i Evropës mirëpret progresin e konsiderueshëm të arritur nga vendi ynë, i cili ka çuar në hapjen e të gjitha grup-kapitujve negociues. Këshilli bën thirrje për bashkëpunim të gjerë politik dhe institucional për të garantuar përparim të mëtejshëm.