Komisionerja Kos: Kishim rënë dakord për të shfuqizuar ligjin e Investimeve Strategjike, protestat janë pjesë e demokracisë

Shqipëria hodhi një tjetër hap të rëndësishëm drejt anëtarësimit të plotë në Bashkimin Europian. Komisionerja Marta Kos gjatë Konferencës Ndërqeveritare në Bruksel tha se edhe para protestave për investimin në Zvërnec, ishte diskutuar anulimi i ligjit për Investimet Strategjike. Për të protestat janë pjesë e proceseve demokratike, duke theksuar se Shqipëria duhet të harmonizojë legjislacionin për të cilin ka rënë dakord me BE-në.

“Lidhur me projektin specifik, mbrojtja e mjedisit është pjesë e kritereve të anëtarësimit në BE. Edhe para protestave kishim rënë dakord me Shqipërinë që, gjatë këtij viti, të shfuqizohej ligji për investimet strategjike, si edhe amendamentet e vitit 2014. Do t’i inkurajoja autoritetet që ta bëjnë këtë sa më shpejt të jetë e mundur.

Protestat janë pjesë e proceseve demokratike dhe mënyra se si vendet i trajtojnë ato është gjithashtu pjesë e këtyre proceseve. Siç e thashë, procesi i anëtarësimit është një proces i vazhdueshëm. Shqipëria duhet ta harmonizojë legjislacionin me atë për të cilin kemi rënë dakord”, u shpreh komisionerja Kos.