Kryebashkiaku Llatja u bashkohet nxënësve në nismën mjedisore “Zëri i Natyrës” në shkollat e Elbasanit

Kryetari i Bashkisë Elbasan, Gledian Llatja, ishte sot i pranishëm në shkollën 9-vjeçare “Fadil Gurmani”, ku së bashku me nxënësit mori pjesë në mbjelljen e disa pemëve në kuadër të projektit “Zëri i Natyrës – Ne mësojmë, rritemi dhe mbjellim jetë”. Kjo nismë do të shtrihet në të gjitha shkollat e qytetit, duke u kthyer në një fushatë të gjerë ndërgjegjësimi dhe veprimi për mjedisin.

Llatja theksoi se edukimi i brezave të rinj mbi kujdesin ndaj natyrës është një investim thelbësor për të ardhmen e Elbasanit dhe se bashkia do të vijojë të mbështesë projekte që sjellin më shumë gjelbërim dhe cilësi jete në komunitet.

Synimi i “Zërit të Natyrës” është të krijojë një kulturë bashkëpunimi mes nxënësve, mësuesve dhe institucioneve, përmes aktiviteteve praktike si mbjellja e pemëve dhe mirëmbajtja e hapësirave të gjelbra.

Bashkia Elbasan fton qytetarët dhe komunitetin të bashkohen në këtë nismë të përbashkët, që synon një mjedis më të pastër dhe një qytet më të gjelbër për të gjithë.