Luan Rama: Burri mbahet prej llafi, jo prej timoni

Nënkryetari i LSI-së, Luan Rama ka marrë pjesë në çeljen e fushatës së LSI në Kukës, ndërsa ka përcjellë mesazhe të forta politike. Rama ka deklaruar se objektivi i LSI në zgjedhjet e 25 Qershorit, është të dalë forcë e parë politike, ndërsa ka theksuar se në Kukës do arrijë të fitore spektakolare.

Po nga Kukësi, numri dy i LSI ironizoi dhe qëndrimet e kryeministrit Edi Rama i cili është shprehur se PS duhet ta marrë e vetme “timonin e qeverisë”.

Luan Rama ka thënë se në Malësi, burri vlerësohet nga fjala e mbajtur dhe jo nga timoni. “Fitorja e LSI-së është një shans edhe për socialistët dhe demokratët. Ne e dimë që në Malësi, burri mbahet prej llafi, jo prej timoni. Fitorja e LSI-së do të vijë për shkak se ne do të ulim taksat dhe do krijojmë më shumë vende pune. LSI do të fitojë edhe në Kukës me një kandidat nga Kukësi”, u shpreh nënkryetari i LSI, Luan Rama.

Qëndrimi i Luan Ramës vjen pas deklaratave të shpeshta të kryeministrit se në këto zgjedhjet PS-ja dhe ai kërkon që ta këtë vetë timonin e qeverisë. Kjo është dhe motoja kryesore e fushatës së Partisë Socialiste, e cila nuk po prezanton as program dhe as po jep alternativë përballë Partisë Demokratike, që e cilëson si kundërshtare historike. Që pas marrëveshjes mes Edi Ramës dhe Lulzim Bashës, PS ka shqetësim vetëm çështjen e “timonin”. Ndërkohë që në zgjedhje zakonisht flitet për programe dhe për alternativa dhe jo se kush do të jetë personi që do punësohet si Kryeministër.