“Mënyra si trajtojmë komunitetet, tregon se ç’shoqëri jemi”

Kryeministri Edi Rama, gjatë vizitës së tij dje në juglindje të vendit, është ndalur në Korçë ku është bërë edhe përurimi i një qendre të re për komunitetin rom. Dhe me këtë rast, ai u shpreh se me vepra të tilla mund të bëhet një ndryshim thelbësor në përpjekjen për integrimin e ketij komuniteti me dinjitet. “Trajtimi ndaj komuniteteve tregon dhe çfarë shoqerie jemi. Ritheksoj se shembulli i Bashkisë Korçë, duke adresuar me dinjitet, duke e kuptuar si çështje dinjiteti shoqëror dhe njerëzor, përbën shembull rrezatues për ne si qeveri. Shembulli i parë i integrimit ne Këshillin Bashkiak, i një anëtari nga këto komunitete është pjesë e shembullit tërësor që nga Korça i jepet gjithë Shqipërisë“, u shpreh Rama. Më tej kryeministri vijoi duke thënë se tashmë ka një vullnet për ta trajtuar me seriozitet problematikën e këtij komuniteti. “Përcjellim një mesazh të vullnetit per ta trajtuar me seriozitet dhe dinjitet problematiken e ketij komuniteti. Ne besojmë që me zgjidhje cilësore, një zinxhir veprash të tilla mund të sjellin një ndryshim thelbësor në përpjekjen për integrim me dinjitet”, theksoi kryeminsitri i vendit nga Korça. Kujtojmë sakaq se kjo qender e ndërtuar nga një bashkëpunim mes Bashkisë Korçë dhe UNDP do t’u japë zgjidhje një sërë problemesh me të cilat përballen komunitetet, si problemet ekonomike, kushtet e papërshtatshme të jetesës, problemet shëndetësore, arsimi publik, gjetja e një tregu pune dhe regjistrimi civil apo edhe probleme të tjera të rëndësishme sociale.