Meta: Shqipëria po rrëshqet drejt narkoshtetit, korrupsioni dhe paratë e drogës po shkatërrojnë ekonominë

Kreu i Partisë së Lirisë, Ilir Meta ka reaguar lidhur me situatën ekonomike dhe nivelin e korrupsionit, duke akuzuar qeverinë për lidhje me narkoekonomi. Meta shkruan se zhvlerësimi i vazhdueshëm i euros dhe dollarit përballë lekut është një tregues i qartë i deformimit të ekonomisë shqiptare. Sipas tij, “tatëpjeta e pandalshme e zhvlerësimit të euros dhe dollarit me lekun tregon se narkoekonomia është vetë narkoshteti”.

Postimi i plotë

“Diella” nuk i mbulon dot të vërtetat që i di e gjithë bota, por dhe që i vuajnë çdo ditë e më shumë shqiptarët.

Shikoni tatëpjetën e pandalshme të zhvlerësimit të euros dhe dollarit me lekun, për të kuptuar se narkoekonomia është vetë Narkoshteti.

Por mjafton të shihni edhe dishezën me 11 vende për korrupsionin në raportin e Transparency International për të kuptuar se kur paratë e drogës dhe korrupsionit shkrihen në një, siç është shkrirë partia në pushtet me shtetin, pasojat janë katastrofike për qytetarët.

Këta jo vetëm kërcënojnë gazetarët vendas por duan t’u mbyllin gojën edhe atyre të huaj, si gazetarit investigativ italian, Nello Trocchia, të cilit i shpreh solidaritetin tim të plotë.