”Ndjesa e një monstre”, Berisha për ministres serbe: Të shpallet ”non-grata”

Kryetari i PD-së, Sali Berisha, ka reaguar sërish ndaj deklaratës së ministres në qeverinë e Aleksandar Vuçiqit, Snezhana Paunoviq, e cila sipas tij ka deklaruar se “po të ishte në vend të Sllobodan Millosheviqit më 1998, do ta spastronte etnikisht Kosovën”. Në një reagim publik, Berisha e ka cilësuar deklaratën si “raciste, antishqiptare dhe çnjerëzore”, duke thënë se ajo përbën një qëndrim që justifikon gjenocidin si mënyrë për zgjidhjen e konflikteve ndëretnike.

Postimi i plotë

Ndjesa e një monstre! Miq, deklarata e Snezhana Paunoviq, ministre në qeverinë e Aleksandar Vuçiqit, se “po të ishte në vend të Sllobodan Millosheviqit më 1998, do ta spastronte etnikisht Kosovën”, shkaktoi reagime të shumta.

Ndaj kësaj deklarate, me të cilën kjo monstër dëshmonte se për të gjenocidi është mënyra e zgjidhjes së problemeve ndëretnike, reaguan ashpër Zëdhënësia e Komisionit Evropian, Komisionerja për Zgjerim, Znj. Kos, Ministria e Jashtme e Britanisë së Madhe, deputetë evropianë, si dhe dhjetëra deputetë e personalitete në Serbi por, natyrisht, jo qeveria e Tiranës.

Ndaj të gjitha këtyre reagimeve, monstra e gjenocidit “kërkoi ndjesë” dhe e “korrigjoi” me cinizëm ekstrem deklaratën e saj, duke thënë se ajo duhej të kishte thënë “deportim” dhe jo “spastrim etnik”, duke dëshmuar kështu se thelbi i moralit të saj është racizmi ndaj etnisë tjetër dhe gjenocidi.

Me këtë rast, Partia Demokratike dënon edhe një herë me forcën më të madhe deklaratat raciste, antishqiptare dhe çnjerëzore të ministres serbe, heshtjen si fija e barit të narkoqeverisë së Tiranës, si dhe përsërit kërkesën për shpalljen e saj “non grata” dhe ngritjen e padisë për nxitje të gjenocidit ndaj saj.