”Nga njeriu i Soros te njeriu i Kushner”, Rama: Kur i takova nuk dihej nëse Trump ikte në burg ose në Shtëpinë e Bardhë

Kryeministri Edi Rama gjatë konferencës për shtyp me gazetarët e BE-së, ardhur në Tiranë, tha se vëmendja ndërkombëtare ndaj protestave në Shqipëri ka ardhur si pasojë e përfshirjes së familjes së Donald Turmp në projektin e Sazanit dhe atë të Zvërnecit. Por sipas tij kjo është e padrejtë.

”Kur Jared Kushner dhe Ivanka Trump erdhën këtu, nuk ishte ende e qartë nëse Donald Trump do të shkonte në burg apo në Shtëpinë e Bardhë. Dhe për mua, ata ishin investitorë amerikanë që donin të dinin nëse kishin një mundësi për të investuar në Shqipëri.

Nuk ishin familja e Donald Turmp, sepse ai asokohe mund të shkonte edhe në burg sepse përballej me shumë akuza.

Nga njëra anë më thonë gjithmonë që jam njeriu i Sorosit, nga ana tjetër njeriu i Kushner-it. Pa gjejeni se kush jam? Unë jam kryeministri i Shqipërisë që dua që të gjithë të vijnë të investojnë këtu dhe nuk mendoj se Shqipëria duhet të jetë ushqim për betejat politike në Amerikë apo diku gjetkë”.