Një kompani shqiptare këpucësh, në Panairin Ndërkombëtar në Rusi

Në datat 15-18 mars në Rusi do të zhvillohet Panairi Ndërkombëtar i Këpucëve, ku ndër specialistët e tjerë të industrisë, do të marrë pjesë edhe kompania shqiptare e prodhimit të këpucëve “Donianna”.

Kjo kompani prodhon këpucë nga lëkura për burra dhe gra. Është themeluar në vitin 1992 dhe është e njohur në shumë vende evropiane.

Në prag të Panairit Ambasadori i Rusisë në Tiranë, z. Aleksander Karpushin takoi drejtoren e kësaj kompanie, znj. Donika Mici, me të cilën u diskutua mbi perspektivat e bashkëpunimit në fushën ekonomiko-tregtare dhe futjes së kompanisë “Donianna” në tregun rus.

Mici tregoi për marrëdhëniet që kompania e saj ka krijuar me prodhuesit rusë të lëkurës dhe u shpreh e interesuar për të zhvilluar lidhje më të ngushta me ta.

Gjithashtu, i bëri të ditur Ambasadorit se në Panairin e Moskës kompania “Donianna” do të prezantojë një koleksion këpucësh të krijuar posaçërisht për blerësit rusë.

Z. Karpushin, nga ana e tij, përshëndeti interesin e biznesit shqiptar për të zgjeruar kontakte me partnerët në Rusi dhe shprehu gatishmërinë për t’i dhënë çdo lloj ndihme.