PD: Sulmi ndaj Tahir Sinanit dhe UÇK-së, akt antishqiptar i orkestruar nga Rama

Partia Demokratike ka reaguar ashpër ndaj deklaratave që, sipas saj, cenojnë figurën e Heroit të Kombit, Tahir Sinani, dhe luftëtarët e Ushtria Çlirimtare e Kosovës. Në një deklaratë për media, PD akuzon Taulant Balla se ka ndërmarrë një sulm të papranueshëm ndaj figurave të luftës së Kosovës, duke e cilësuar këtë si një veprim të nxitur nga Edi Rama. Sipas demokratëve, lufta për çlirimin e Kosovës përfaqëson një nga faqet më të rëndësishme të historisë moderne shqiptare dhe çdo përpjekje për të njollosur figurat e saj përbën një akt kundër interesave kombëtare.

Deklaratë e Partisë Demokratike

Përpjekja për përbaltjen, me porosi të Edi Ramës, të Heroit të Kombit Tahir Sinani dhe luftëtarëve të tjerë të UÇK-së është një akt i ulët, antishqiptar dhe serbomadh nga Taulant Balla, eksponenti më kryesor i krimit të organizuar pas Edi Ramës në Shqipëri.

Partia Demokratike e konsideron luftën për çlirimin e Kosovës si faqen më të ndritur të luftërave të shqiptarëve për liri dhe dinjitet kombëtar pas atyre të Skënderbeut.

Partia Demokratike dënon me forcën më të madhe, si antishqiptare, çdo përpjekje të Edi Ramës, argatit të Aleksandër Vuçiçit dhe vasalëve të tij si Taulant Balla e të tjerë, për përbaltjen e luftës për çlirimin e Kosovës, heronjtë, të rënët dhe luftëtarët e saj