Peleshi: Integrimi në BE kërkon angazhimin e të gjithë shoqërisë

Ka nisur sot edicioni i 10-të i Shkollës së Integrimit Evropian, një nismë e konsoliduar e Kuvendit të Shqipërisë dhe Këshillit Kombëtar të Integrimit Evropian, në partneritet me Fondacionin Shoqëria e Hapur për Shqipërinë (OSFA), Delegacionin e BE-së dhe Fondacionin “Friedrich Ebert Stiftung”.

Në ceremoninë hapëse përshëndeti Kryetari i Kuvendit, Niko Peleshi, i cili e cilësoi këtë edicion jubilar si një moment të veçantë për rrugëtimin evropian të vendit.

“Kanë kaluar plot 10 vite që kur u hodhën hapat e parë të kësaj nisme. Sot, shkolla e Integrimit Evropian është kthyer në një traditë të konsoliduar, me mbi 350 alumni që japin kontributin e tyre në fusha të ndryshme,” tha Peleshi.

Ai theksoi se shkolla ofron një kuadër të vlefshëm teorik dhe praktik për çështjet evropiane, duke mbështetur përgatitjen e Shqipërisë në procesin e integrimit.

Edicioni i sivjetshëm ka shënuar një rekord prej 430 aplikimesh – dyfish më shumë se vitin e kaluar – çka dëshmon suksesin dhe rëndësinë e programit.

Peleshi nënvizoi se integrimi evropian nuk është thjesht një objektiv strategjik i shtetit, por një proces që kërkon angazhimin e të gjithë shoqërisë:

“Asnjë institucion i vetëm nuk mund ta çojë përpara këtë proces pa pjesëmarrjen aktive të administratës publike, shoqërisë civile, medias, komunitetit akademik dhe sipërmarrjes.”

Ai theksoi rolin të Kuvendit si bashkëthemelues dhe mbështetës i vazhdueshëm i kësaj nisme, duke garantuar mbikëqyrje dhe përkushtim institucional për zbatimin e reformave të dakorduara.

“Rrugëtimi i Shqipërisë drejt BE është aspirata jonë kombëtare e kahershme,” tha Peleshi, duke shtuar se vendi ndodhet në një fazë historike pas hapjes zyrtare të negociatave të anëtarësimit.

“Integrimi evropian nuk është dhuratë, por rezultat i reformave të thella dhe punës së palodhur. Ky progres na mbush me optimizëm, por njëkohësisht na kujton përgjegjësinë që kemi përpara.”