Aktori i njohur shqiptar Mehdi Malkaj u bë një nga zërat më të spikatur të protestës këtë të mërkurë para Kryeministrisë, duke përcjellë një mesazh që preku të pranishmit.
”Për dashurinë jap jetën, por për atdheun jap dashurinë”, deklaroi ai, duke vënë në plan të parë sakrificën dhe përkushtimin ndaj vendit. Në fjalën e tij, Malkaj ndaloi edhe te roli i të moshuarve në shoqëri, duke theksuar se ata janë bartësit e kujtesës kolektive të kombit.
”Gjyshërit janë kujtesa emocionale dhe historike e një populli”, u shpreh aktori, duke kërkuar më shumë vëmendje dhe respekt për brezat që kanë ndërtuar historinë e vendit.
Mes duartrokitjeve të protestuesve, fjalët e Malkajt u kthyen në një nga momentet më të veçanta të tubimit, duke sjellë jo vetëm mesazhe qytetare, por edhe reflektim mbi identitetin, kujtesën dhe dashurinë për atdheun. Protesta është në ditën e 18-të.