Prefekti i Qarkut Tiranë, Shkëlqim Hajdari, ka bërë të ditur se të gjitha vatrat e zjarrit në territorin e Tiranës janë shuar, ndërsa një vatër e rindezur në malin e Dajtit vijon të jetë në fokus të forcave të emergjencave.
Përmes një njoftimi në rrjetet sociale, prefekti Hajdari informon se forcat e ushtrisë, shërbimet zjarrfikëse dhe strukturat e zonave të mbrojtura kanë nisur ngjitjen drejt malit të Dajtit për të ndërhyrë në terren.
Në dispozicion të ekipeve janë vënë edhe mjetet e nevojshme për ndërhyrjen, përfshirë sharrat elektrike, ndërsa operacioni do të mbështetet edhe nga ajri me anë të një helikopteri.
Prefekti Shkëlqim Hajdari shprehet optimist se edhe kjo vatër do të neutralizohet gjatë ditës së sotme, duke shmangur përhapjen e mëtejshme të zjarrit në zonën e Dajtit.
“Shpresojmë që dhe këtë vatër zjarri ta mbyllim gjatë ditës së sotme”, shkruan Hajdari në reagimin e tij.
