Rama i besoi Ministrinë e Jashtme, Spiropali: Integrimi në BE, misioni ynë historik

Kryetarja në detyrë e Kuvendit të Shqipërisë, Elisa Spiropali reagoi për herë të parë pas propozimit nga ana e kryeministrit Edi Rama, për ta emëruar si Ministër për Evropën dhe Punët e Jashtme. Spiropali e cilësoi detyrën që i është besuar si një nder dhe përgjegjësi të madhe. Ajo thekson se integrimi i Shqipërisë në BE deri në vitin 2030 është një mision historik.

Postimi i plotë

Drejt Shqipërisë 2030! Nder dhe përgjegjësi për mua që pas drejtimit të Kuvendit të Shqipërisë, të marr besimin e Kryeministrit Rama dhe Asamblesë Socialiste për të drejtuar Ministrinë për Europën dhe Punët e Jashtme.

Integrimi i Shqipërisë në familjen tonë natyrale europiane brenda 2030-s nuk është thjesht objektiv politik, por misioni ynë historik. Prestigji, forca dhe dinjiteti i Shqipërisë dhe i shqiptarëve kudo janë, kanë qenë dhe do të jenë detyra e nderi i jetës sime.

Me besim të palëkundur dhe shumë sfida përpara, ecim së bashku drejt të ardhmes europiane.

Mirënjohje.