Rama: Ide e hedhur prej kohësh, zgjidhje pozitive për të dyja palët

Gjatë një konference të përbashkët me ambasadorin e Bashkimit Europian në Tiranë,  kryeministri Edi Rama komentoi deklaratën e shefes së zgjerimit të BE-së,  Marta Kos,  e cila në një intervistë për Financial Times propozoi që shtetet e reja anëtare të kalojnë në një periudhë prove pas anëtarësimit.

Rama theksoi se kjo qasje është ide e artikuluar prej tij më herët,  duke iu referuar deklaratave të mëparshme publike:

“Lutesha,  përpara se ta merrni për mungesë modestie,  t’i referoheshit arkivave tuaja. Këtë ide e kam hedhur vetë shumë herë më përpara dhe i qëndroj kësaj ideje. Nuk e kam shpikur unë,  edhe pse e kam hedhur në publik.”

Ai e cilësoi periudhën e provës si një zgjidhje pragmatike,  që i jep mundësi të dyja palëve të marrin atë që duan,  pa krijuar pengesa për miratim formal.

Sipas kryeministrit,  Ballkani është më i qetë se më parë,  dhe kjo është një arsye e mjaftueshme për të gjetur një rrugë të ndërmjetme pozitive për procesin e integrimit.Shqipëria kërkon akses të plotë në strukturat e BE-së dhe ulje në tryezë si e barabartë dhe BE-ja kërkon garanci për funksionimin institucional pa rrezikun e vetos.

Rama shtoi se propozimet konkrete janë bërë,  dhe nuk ka nevojë për ndryshime traktatesh,  por thjesht për marrëveshje politike që mundësojnë pjesëmarrjen pa të drejtë vetoje.