Rama intervistë me gazetaren e ”Channel 4”, Berisha: Fillimisht e mohoi, më pas foli për projektin në Zvërnec

Sali Berisha ka reaguar me një deklaratë kritike ndaj kryeministrit Edi Rama, duke akuzuar atë për kontradikta lidhur me një projekt të përmendur në një intervistë me gazetaren e Channel 4, Lindsey Hilsum.

Në reagimin e tij, Berisha pretendon se Rama fillimisht ka mohuar ekzistencën e një projekti, ndërsa më pas ka folur për të njëjtin projekt gjatë bisedës. “Kur nuk ke turp, thua çdo gjë dhe bën çdo gjë!”, shkruan Berisha, duke shtuar se kjo kontradiktë, sipas tij, tregon mungesë transparence nga ana e kryeministrit.

Berisha e ka cilësuar këtë sjellje si pjesë të një mënyre qeverisjeje që, sipas tij, mbështetet te manipulimi i opinionit publik. Kryeministri Rama nuk ka reaguar ende ndaj kësaj deklarate.

Postimi i plotë

Kur nuk ke turp, thua çdo gjë dhe bën çdo gjë! Gazetarja e njohur e Channel 4, Lindsey Hilsum, ia çmonton në pak minuta narrativën Edi Ramës. Fillimisht, Rama pretendon se nuk ka asnjë projekt. Vetëm pak çaste më vonë, nis të flasë për vetë projektin. Një kontradiktë që flet më shumë se çdo koment. Gënjeshtra mbetet e vetmja mënyrë mbijetese politike që ai njeh.