Rama mbron Gjiknurin: Hetim privatizimit të OSHEE

Në fjalën e mbajtur në 1-vjetorin e nisjes së aksionit për mbledhjen e borxheve prej OSHEE-së, kryeministri Edi Rama u ndal edhe njëherë tjetër tek privatizimi i saj dhe sjellja e shtetit shqiptar pas dëbimit të kompanisë "CEZ", duke deklaruar se pala shqiptare do të kërkojë një hetim penal me ekspertizë ndërkombëtare për atë që ka ndodhur në gjithë sistemin energjitik para marrëveshjes së nënshkruar me çekët.

Kryeministri tha gjithashtu se marrëveshja me CEZ-in po sulmohet sot nga personat që abuzuan me sektorin.

“Ajo marrëveshje, që sot sulmohet në mënyrë të orkestruar për arsye që ne e dimë shumë mirë dhe jam i bindur që koha do ta provojë këtë, të shtyrë nga frika legjitime e atyre që duhet të përgjigjen për atë që i bënë sektorit energjitik, është një marrëveshje e negociuar jo në kulisa, as në zyrën e Kryeministrit, si pazaret e faktuara me dokumenta, që do të jenë pjesë e hetimit penal që ne do të kërkojmë me mbështetjen e ekspertizës ndërkombëtare, por u negociua në Vjenë me pjesëmarrjen e 15 personave nga qeveria shqiptare dhe me seanca të regjistruara”, tha Rama.

Kryeministri ripërsëriti qëndrimin e mazhorancës se pala shqiptare nuk kishte asnjë mundësi të fitonte çështjen në Arbitrazh dhe e gjithë kjo falë veprimeve të kryera nga shteti shqiptar pas prishjes me kompaninë çeke.

“Privatizim tërësisht abuziv, të nisur të dështuar, ku qeveria hyri në një pazar të madh dhe për këtë arsye u bë ai privatizim dhe kur u prish pazari i madh bëri fajin e madh të ofensivës policore duke ekspozuar tërësisht shtetin shqiptarë përballë privatizuesve dhe duke e dënuar shtetin shqiptar si palë humbëse në çdolloj gjykate”, shtoi kryeministri.

Rama u shpreh se sulmi me polici ndaj kompanisë dhe vendosja e një administratori shtetëror në krye të një prone private i hapën rrugën abuzimit dhe vjedhjeve me shpresën se në atë rrugë do të vinin votat për të mbajtur në këmbë qeveria.

Gjithashtu, kreu i qeverisë e mbrojti ministrin Damian Gjiknuri, i vendosur në qendër të akuzave për korrupsion nga ana e opozitës.

“Sot, ministri që udhëhoqi operacion historik është nën akuzë nga ata që janë përgjegjësit kryesorë të asaj që gjetëm 1 vit më parë, një kompani e marrë fund me 1 mld dollarë borxhe të krijuara në vetëm 6 vjet, nga 2007 deri në vitin 2014”, tha Rama.

Rama tha se falë kësaj reforme në energji, sot vendi ka marrë frutet e para ku do të zhvillohet ky sektor dhe do të bëhet në një kohë të arsyeshme një burimi madh fitimi për Shqipërinë dhe shqiptarët.