Rama për “Al Jazeera”: Rusia nuk do të sulmojë asnjë vend tjetër europian

Kryeministri Edi Rama ka minimizuar shqetësimet perëndimore për një përshkallëzim të mundshëm të agresionit rus në Evropë,  duke deklaruar për “Al Jazeera” se Rusia nuk do të sulmojë Shqipërinë apo ndonjë vend tjetër europian. Ai theksoi se NATO është e përgatitur për çdo lloj agresioni dhe mbetet “ushtria më e fortë në botë”.

Deklaratat u bënë në kuadër të konferencës “Berlin Global Dialogue”,  ku Rama sugjeroi se Bashkimi Evropian duhet të hartojë një plan konkret paqeje për Ukrainën,  në një kohë kur Shtetet e Bashkuara po përpiqen të ndërmjetësojnë për t’i dhënë fund luftës.

Rama theksoi se: “Rusia nuk do të sulmojë Shqipërinë dhe asnjë vend tjetër europian” dhe “NATO nuk ka arsye të ketë frikë nga askush.”

Ai kujtoi se nga 27 vendet anëtare të BE-së,  23 janë gjithashtu pjesë e NATO-s,  përfshirë Shqipërinë,  e cila është anëtare e Aleancës dhe kandidate për anëtarësim në BE që prej vitit 2014.

Sipas Ramës,  BE-ja po përballet me provokime të vazhdueshme nga Rusia,  veçanërisht në vendet kufitare. Që nga shtatori,  disa shtete europiane kanë raportuar shkelje ajrore me dronë nga Rusia,  ndërsa NATO ka penguar avionë rusë që dyshohej se kishin hyrë në hapësirën ajrore të Estonisë.

Moska i ka mohuar akuzat,  duke i cilësuar si “histeri të nxitur politikisht”.

Rama theksoi se Shqipëria nuk ndjen presion të veçantë nga Rusia,  ndryshe nga vendet e Evropës Lindore. Ai tha: “Jam shqiptar”. Nuk kemi frikë… Nuk ka vend për armiqësi ruse në Shqipëri.”

Ndërkohë,  ekziston frika se lufta në Ukrainë mund të përhapet në Ballkanin Perëndimor,  rajon ku tensionet historike mbeten të gjalla. Kryeministri britanik Keir Starmer e quajti rajonin “kaldajën e Europës”.

Të gjashtë vendet e rajonit ndodhen në faza të ndryshme të negociatave për anëtarësim në BE,  duke synuar reforma në gjyqësor,  mirëqenie dhe institucione publike.

Presidentja e Komisionit Europian,  Ursula von der Leyen,  vlerësoi përparimin e Shqipërisë dhe Malit të Zi. Në konferencën për shtyp në Tiranë më 25 tetor,  ajo tha se Shqipëria është “në rrugën e duhur drejt Bashkimit Europian” dhe ka pasur “një përshpejtim të jashtëzakonshëm që nga viti 2022”.

Rama ra dakord,  duke theksuar se ndjenja e hapjes së BE-së ndaj vendeve të Ballkanit është përmirësuar që prej fillimit të luftës në Ukrainë.