Rama tha se edhe Rusia ka më pak të paraburgosur, Tedi Blushi: Arrestimi i Metës një aksion terrorist

Partia e Lirisë ka reaguar ndaj deklaratave të kryeministrit Edi Rama lidhur me numrin e personave në paraburgim në Shqipëri, duke sjellë si shembull arrestimin e kreut të saj, Ilir Meta. Gjatë prezantimit të draftit për ndryshimet në Kodin e Procedurës Penale në Tiranë, Rama deklaroi se edhe Rusia, të cilën e përshkroi si “atdheun e represionit”, ka më pak persona në paraburgim se Shqipëria.

Në përgjigje, sekretari i Përgjithshëm i Partisë së Lirisë, Tedi Blushi, publikoi një video ku krahasohet arrestimi i Ilir Metës me atë të opozitarit rus Alexei Navalny. Përmes këtij krahasimi, Blushi pretendon se deklaratat e Ramës për represionin në Rusi bien ndesh me mënyrën se si, sipas tij, është trajtuar kundërshtari politik në Shqipëri.

Blushi e cilësoi arrestimin e Ilir Metës jo si një procedurë të zakonshme ligjore, por si një “rrëmbim” të organizuar me urdhër politik. Partia e Lirisë e paraqet rastin e Metës si argument në debatin mbi përdorimin e paraburgimit dhe standardet e procedurave penale në Shqipëri.

Deklarata e plotë e Blushit

Si nuk të vjen turp Edi Rama kur krahasohesh me Rusinë?!

Ti që në mënyrën më kriminale dhe mafioze e rrëmbeve kundërshtarin tënd politik, Ilir Metën, në mes të ditës, duke përdorur Gysin, Prodën, Vilson Balën dhe horrat e bandave të Durrësit dhe Elbasanit.

Duhet të jesh vërtet i paturp të barazohesh me Rusinë, ti që nuk krahasohesh dot as me Putinin, që e arrestoi Navalnyn me forca policore të identifikuara dhe me procedura formale publike.

Ti që e ktheve arrestimin e Ilir Metës në një aksion terrorist rrëmbimi me dhunë, me sjellje tipike mafioze, të çertifikuar si rrëmbim edhe me vendim gjykate.

A ke fytyrë ti, të krahasohesh me Rusinë, kur ke urdhëruar personalishtn, që Ilir Meta të mos japë asnjë intervistë nga paraburgimi, edhe kur gazetarët kanë marrë leje nga SPAK-u, ndërkohë që Putini i lejonte Navalnyn dhe Khodorkovsky të jepnin intervista për mediat ndërkombëtare nga burgjet e Rusisë.

Ti ke fytyrë e krahasohesh me Rusinë, kur ke urdhëruar personalisht që deputetë dhe eurodeputetë, që të mos lejohen të takohen me Ilir Metën.

Si mund të krahasohesh ti me Rusinë, që i ke kthyer burgjet në institucione persekutimi çnjerëzor politik për kundërshtarët e tu, por në vende rehatie dhe qejfesh perverse veç për bedelët e tu?

Para se të tregosh me gisht Rusinë, jep llogari për kapjen e shtetit nga mafia dhe për represionin kriminal politik ndaj kundërshtarëve të tu!

Dhuna është fytyra jote!

Se je ti që fute mijëra njerëz në burg se nuk kishin mundësi të paguanin energjinë elektrike dhe je gati t’i mbipopullosh burgjet edhe për parkim dysh apo se riparojnë kotecet e pulave dhe tualetet e shtëpive!

Edi Rama sot ti nuk ke asnjë vend të Europës me të cilin të krahasohesh sepse ti je njolla e zezë e Europës dhe mënxyra më e madhe e Shqipërisë!