Reforma zgjedhore, Gjiknuri: Partitë me një mandat kanë të drejtën e propozimeve

Deputeti i PS-së, Damian Gjiknuri nga jashtë sallës së Kuvendit, tha se partitë me nga një mandat parlamentar, do të kenë të drejtën të bëjnë propozime dhe të marrin pjesë në diskutimet e komisionit të posaçëm për Reformën Zgjedhore. Deputeti socialist nënvizoi se objektivi kryesor i reformës është përmirësimi i procesit zgjedhor dhe garantimi i një sistemi që reflekton kërkesat e aktorëve politikë dhe standardet ndërkombëtare.

”Ne u kemi dhënë të drejtën të gjitha partive, edhe atyre që kanë nga një mandat, të kenë të drejtën e propozimeve dhe të diskutimit. Vetëm nuk janë anëtarë formalë të Komisionit të Reformës, për të ruajtur një numër funksional. Qëllimi është që procesi të jetë gjithëpërfshirës, duke u mbështetur te ekspertiza e ODIHR”, u shpreh Gjiknuri.

Nga ana tjetër, ai shtoi se komisioni i posaçëm do të trajtojë të gjitha rekomandimet e ODIHR-it dhe se çdo ndryshim do të pasqyrohet në ligjin zgjedhor. ”Këto çështje do të trajtohen në ligjin zgjedhor. Patronazhimi është një funksion politik në anëtarësinë e PS-së, nuk ka të bëjë me konceptin që përdoret rëndom në politikë. Çdo gjë është në tavolinë! Herën e fundit e ndryshuam sistemin zgjedhor bazuar në kërkesat e PD-së. Edhe këtë herë do të diskutojmë për variantin më të mirë”, tha Gjiknuri.