Reforma zgjedhore ndez debatet, KQZ propozon rregulla më të forta. Mësohen kërkesat e PS dhe PD

Nevoja për të forcuar garancitë ligjore kundër keqpërdorimit të burimeve shtetërore gjatë proceseve zgjedhore ishte në qendër të një tryeze diskutimi ku morën pjesë përfaqësues të institucioneve vendase dhe partnerëve ndërkombëtarë. Komisioneri Shtetëror i Zgjedhjeve, Ilirjan Celibashi, kërkoi që Kodi i ri Zgjedhor të vendosë kufij të qartë mes shtetit dhe partisë në pushtet, duke e konsideruar këtë një standard të domosdoshëm të administrimit zgjedhor.

Nga ana e mazhorancës, Damian Gjiknuri pranoi se gjetja e ekuilibrit mes ushtrimit të qeverisjes dhe shmangies së avantazheve elektorale është një sfidë, por theksoi se synimi mbetet përgatitja e një pakete të re ligjore brenda këtij viti. “Si të arrijmë një balancë të drejtë mes nevojës për të qeverisur, por njëkohësisht edhe të mos krijojmë avantazhe të padrejta. Është një balancë nganjëherë e vështirë, sepse nuk besoj se ndonjë zgjidhje absolute jep rezultat në dobi të zgjedhjeve. Të vijmë me paketë ligjore brenda këtij viti”, u shpreh Gjiknuri.

Në të njëjtën tryezë, ku ishin të pranishëm edhe ekspertë ndërkombëtarë, opozita ngriti shqetësimin për zbatimin e ligjit, duke kërkuar masa më të forta ndaj shkelësve dhe fenomenit të patronazhistëve. “Kemi edhe akte rregullatore, por në fund numri i ankesave nuk korrespondon me numrin e sanksioneve. Nuk mund të vazhdojmë ta bëjmë kornizën gjithnjë e më të rëndë, ndërkohë që, nga ana tjetër, asgjë nuk zbatohet”, deklaroi Oerd Bylykbashi.

Përfaqësuesit e OSBE-së dhe Bashkimit Evropian apeluan për dialog politik mes palëve, me qëllim miratimin e ndryshimeve të nevojshme në Kodin Zgjedhor, për të garantuar kushte të barabarta konkurrimi dhe për të parandaluar keqpërdorimin e burimeve shtetërore gjatë fushatave elektorale.