Rinas, gati 200 mijë pasagjerë më shumë

Numri i pasagjerëve në “Tirana International Airport” (TIA) u rrit në 2015-n.

Sipas statistikave zyrtare të TIA-s, numri i pasagjerëve gjatë vitit 2015 llogaritet 1,997,044 pasagjerë me një rritje prej 186,729 pasagjerësh krahasuar me vitin 2014. Gjatë vitit 2014 u regjistruan 1,810,315 pasagjerë.

Më 1 prill 2016, qeveria e Shqipërisë dhe Tirana International Airport (TIA) nënshkruan një marrëveshje kyç, e cila shënon një hap të madh drejt zhvillimit të transportit ajror në Shqipëri dhe liberalizimin e fluturimeve ndërkombëtare.

Ndryshimi i marrëveshjes së koncensionit u arrit pas negociatave intensive mes palëve, e tashmë do të votohet në parlament, për t’i hapur rrugë zhvillimit, ndërtimit dhe operimit të aeroporteve të tjerë në Shqipëri.

Sipas marrëveshjes së përbashkët, kompanisë Tirana International Airport i është dhënë një zgjatje e afatit të koncesionit prej dy vitesh duke mundësuar kështu hapjen e Aeroportit të Kukësit për fluturimet ndërkombëtare. Kjo do të thotë se afati i koncesionit do të shtyhet deri në vitin 2027.

Më tej, në rast të vënies në përdorim të një aeroporti tjetër apo aeroporteve të tjera, si Vlora ose Saranda, afati i koncesionit do të shtyhet me 0.5 vite të tjera për çdo vit operimi të këtyre aeroporteve jugore.

Në vitin 2005, TIA mori në menaxhim Aeroportin e Rinasit kur ai i shërbente rreth 600,000 pasagjerëve në vit. Në vitin 2015, Aeroporti i shërbeu më shumë se 1.9 milionë pasagjerëve, duke shënuar një rritje domethënëse dhe duke ndryshuar imazhin e Shqipërisë si portë hyrëse moderne dhe me standardet më të larta evropiane.

Bazuar në Marrëveshjen e Koncesionit të nënshkruar në vitin 2004 me Qeverinë e Shqipërisë, afati i koncesionit prej 20 vitesh për menaxhimin e Aeroportit Ndërkombëtar filloi në vitin 2005, duke përfshirë të drejtën e ekskluzivitetit mbi fluturimet ndërkombëtare.

Por, burime jo zyrtare bënë të ditur se TIA dhe kompania kineze “Everbright Global Airport and Investment Fund” janë drejt përfundimit të negociatave për shitjen e koncesionin e Rinasit. Burimet thanë se koncesioni pritet t’i shitet për rreth 90 milion dollarë kompanisë kineze “Everbright Global Airport and Investment Fund”.