Kreu i PD-së, Sali Berisha ka ashpërsuar gjuhën ndaj kryeministrit Edi Rama gjatë mbledhjes së grupit parlamentar të PD-së, duke e akuzuar atë se po mbron persona ndaj të cilëve opozita ka ngritur akuza të rënda. Berisha e cilësoi Ramën si “të pabesë” dhe “pa karakter”, ndërsa deklaroi se kryeministri është kthyer në avokat të disa zyrtarëve dhe ish-zyrtarëve të lartë, mes tyre edhe ish-drejtuesja e Shërbimit Informativ Shtetëror, Vlora Hyseni.
Në fjalën e tij, Berisha pretendoi se Hyseni ka përcjellë informacione të klasifikuara te persona të lidhur me grupe të trafikut të drogës. Ai e cilësoi këtë si një çështje me rëndësi të jashtëzakonshme për sigurinë kombëtare dhe akuzoi Ramën se po përpiqet të minimizojë përgjegjësitë e personave të përfshirë.
“Është shndërruar në një avokat të pashembullt të Vlora Hysenit, Ergys Agasit, Ron Yeffet, Linda Karçanajt, Ermal Beqirit dhe Belinda Ballukut”, deklaroi Berisha. Lideri i opozitës pretendoi se veprimet e disa prej këtyre personave janë të lidhura drejtpërdrejt me kryeministrin Rama dhe se pas tyre qëndrojnë interesa financiare.
Berisha e përqendroi një pjesë të deklaratës së tij te pretendimi për nxjerrjen e sekreteve shtetërore, duke e cilësuar si një nga çështjet më të rënda që mund të prekë institucionet shqiptare. “Një shefe e Shërbimit Inteligjent që ka dorëzuar sekrete të shtetit më të rëndësishme te kartele të drogës dhe ndërmjetësi i tyre, kjo shkon në lartësinë e tradhtive më të mëdha”, u shpreh ai.