Shërbimi i jashtëm, pagat dhe rregullat e reja për diplomatët

Qeveria ndryshon dy ligjet e mëparshme, atë të vitit 1998 dhe të vitit 2003, duke pretenduar konsolidimin e mëtejshëm të një shërbimi diplomatik modern

Shërbimi i jashtëm i Shqipërisë u nënshtrohet kritereve dhe rregullave të reja, përmes një projektligji të posaçëm që tashmë qeveria ia ka kaluar Kuvendit. Përmes tij, ndryshohen dy ligjet e mëparshme, ai i vitit 1998 dhe të vitit 2003, duke pretenduar në këtë mënyrë konsolidimin e mëtejshëm të një shërbimi diplomatik modern. “Periudha mbi 10-vjeçare që ka kaluar nga ligji i cili aktualisht është në fuqi ka bërë të nevojshëm rishikimin edhe të këtij akti me synim për t’ia përshtatur interesave të kohës”, sqarojnë ekspertët e qeverisë lidhur me një fakt të tillë. Duke shtuar se në ndryshim nga ligji aktual, projekti i ri sjell disa risi dhe efekte pozitive që synojnë konsolidimin e mëtejshëm të këtij shërbimi mbështetur në karrierën diplomatike. “Më konkretisht, ai rregullon me mirë fushën e kompetencave të Shërbimit të Jashtëm dhe raportet me institucionet qendrore dhe vendore në fushën e marrëdhënieve me jashtë. Zgjeron hapësirat e përfaqësimit diplomatik dhe konsullor në përputhje me dinamikën e zhvillimeve në marrëdhëniet ndërkombëtare. Rregullon në mënyrë më të qartë procesi i emërimit dhe mbarimit të mandatit të kreut të misionit diplomatik dhe postit konsullor dhe personelit diplomatik e konsullor. Përcakton në mënyrë më të saktë raportet e ndërvarësisë dhe koordinimit ndërmjet strukturave të shërbimit të jashtëm. Përcakton kritere profesionale për rekrutimin e diplomatëve të karrierës mbështetur në nivelet e tyre akademike. Sanksionon statusin e diplomatit të karrierës ku përcaktohet ecuria e karrierës diplomatike bazuar në aftësitë profesionale; Sigurohen pastërtia dhe siguria e figurës së diplomatit të karrierës. Përcaktohet në mënyrë më të qartë përfshirja në misionet diplomatike dhe postet konsullore të personave jashtë karrierës diplomatike. Synohet krijimi i një hierarkie më racionale në strukturën e gradave diplomatike. Përcaktohen kritere më të sakta dhe bashkëkohore për trajtimin financiar të diplomatëve jashtë vendit”, janë të gjitha risitë e këtij projekti, që renditen në relacionin përkatës prej qeverisë. Duke shtuar mes të tjerash se për herë të parë dhe në mënyrë të plotë dhe në përputhje me praktikën e vendeve me kushte të ngjashme me Shqipërinë, rregullohet edhe trajtimi i familjarëve që shoqërojnë diplomatët jashtë vendit, duke zgjidhur sipas tyre, një problem që ka ndikuar negativisht në standardet e jetesën e tyre. Kurse sa i përket trajtimit financiar të punonjësve të Shërbimit të Jashtëm, projekt-ligji i ri sqaron se paga e diplomatëve të karrierës që punojnë në Ministrnë e Punëve të Jashtme do të bazohet në gradën diplomatike dhe pozicionin në këtë ministri. Dhe se kjo ministri do të mbulojë për të gjithë diplomatët e emëruar jashtë sigurimet shëndetësore, shoqërore dhe sigurimin e jetës në vendet që paraqesin rrezikshmëri të lartë. “Ky trajtim financiar është bazuar në praktikën e deritanishme si dhe duke marrë për bazë modelet më të mira të vendeve me kushte të ngjashme buxhetore me Shqipërinë”, referojnë ekspertët e qeverisë. Për të përfunduar se një trajtim më dinjitoz është parashikuar të kenë edhe bashkëshortët dhe fëmijët e diplomatit kur emërohen me shërbim jashtë shtetit. Kështu, sipas tyre, bashkëshortëve koha e qëndrimit jashtë do t’iu njihet për efekt të vjetërsisë në punë, ndërsa kontributi për sigurime shoqërore që do të mbulohet nga Ministria e Punëve të Jashtme do të jetë i njëjtë me kontributin që paguante institucioni ku punonte përpara angazhimit të saj në shërbimin e jashtëm. Është parashikuar gjithashtu që bashkëshortja e diplomatit të emëruar në mission diplomatik jashtë shtetit të ketë një pagë sa 50% e diplomatit me gradën atashe 4ndërsa çdo fëmijë i diplomatit do të trajtohet me 20% të pagës së atasheut të emëruar në vendin pritës. “Ky trajtim financiar bëhet me qëllim për të mbështetur familjet e diplomatëve shqiptarë të emëruar jashtë vendit të cilat përballohen me probleme dhe nevoja sociale në kushtet kur trajtimi aktual financiar i diplomatëve është i pamjaftueshëm në krahasim me standardin e jetesës së vendeve ku ata shërbejnë. Gjithashtu, një trajtim i tillë, i bazuar në praktikën e të gjitha vendeve të tjera përfshirë ato të rajonit, zbut problemet që krijohen si pasojë e largimit të detyrueshëm nga puna të bashkëshortëve që shoqërojnë diplomatët në misionet jashtë vendit”, përfundon relacioni në fjalë.

SHIFRAT

Efektet financiare që rrjedhin nga ky projekt-ligj:

Zëri                                                  Në euro    Në dollarë  Në lekë

Pagesa e bashkëshortëve                613,524    11,994       87,220,000

për 140 veta

Pagesa e fëmijëve                            245,412     4,798         35,030,000

për 140 fëmijë

Sigurimi shoqëror i                                                               31,310,000

bashkëshortëve për 140 veta

Shkollimi i fëmijëve në                  320,000     8,800         45,768,000

vendet me gjuhë të rrallë

Sigurimin e jetës për                                                              5,600,000

vendet me rrezik të lartë

Sigurimin e jetës ata që                                                         2,100,000

udhëtojnë  në vendet me rrezik

TOTALI:                                                                     207,028,000 Lekë

Neni 48

Afatet për marrjen e gradave diplomatike

Periudha minimale për kalimin e diplomatit

nga një gradë në një tjetër më të lartë është:

a)Nga Atashe në Sekretar i Tretë                                  – 2 vjet.

b)Nga Sekretar i Tretë në Sekretar i Dytë                    – 3 vjet.

c)Nga Sekretar i Dytë në Sekretar i Parë                      – 3 vjet.

ç)Nga Sekretar i Parë në Këshilltar                               – 4 vjet.

d)Nga Këshilltar në Ministër Këshilltar                       – 3 vjet.

dh)Nga Ministër Këshilltar në Ministër Fuqiplotë       – 3 vjet.

e)Nga Ministër Fuqiplotë në Ambasador                      – 3 vjet.

Neni 49

Barasvlera e gradave

Në poste dhe detyra konsullore, diplomatët emërohen me grada konsullore. Kalimi nga grada diplomatike në atë konsullore bëhet duke respektuar barasvlerën e gradave, si vijon:

a)Konsull i Përgjithshëm Ministër Këshilltar;

b)Konsull Sekretar i Parë ose i Dytë;

c)Zëvendës-konsull Sekretar i Dytë ose i Tretë;

ç)Agjent konsullor Sekretar i Tretë ose Atashe.

Neni 53

Trajtimi financiar i personelit të Shërbimit të Jashtëm

1.Paga e diplomatit të karrierës, i cili punon në Ministrinë e Punëve të Jashtme, caktohet në bazë të gradës diplomatike personale dhe funksionit që ai kryen.

2.Paga për nëpunësin që nuk bën pjesë në sistemin e karrierës diplomatike përcaktohet mbi bazën e statusit që ai ka dhe akteve ligjore dhe nënligjore që rregullojnë trajtimin financiar të tyre.

3.Paga e diplomatit të emëruar pranë misioneve diplomatike dhe posteve konsullore përcaktohen me vendim të Këshillit të Ministrave në bazë të:

a)gradës diplomatike të emërimit;

b)indeksit sipas nivelit të jetesës në vendin pritës;

c)kategorizimit të vendit pritës.