Sherri me anëtaren demokrate, Berisha: Është e lirë të flasë. Lashë një porosi për Këshillin Kombëtar

Kryetari i PD-së, Sali Berisha thotë se ekipi i ri drejtues i propozuar për partinë përfaqëson formimin dhe eksperiencën më të lartë që PD-ja ka pasur ndonjëherë. Duke komentuar debatin edhe me Ilirjana Kuçanajn, ai u shpreh se çdo anëtar ka të drejtën të shprehë mendimin e tij, ndërsa procesi i zgjedhjes zhvillohet me votim të fshehtë mes dy kandidaturave. Berisha shtoi se kandidaturat e paraqitura para Këshillit Kombëtar janë, sipas tij, më cilësoret krahasuar me përbërjet e mëparshme.

Pjesë nga deklarata

Në këtë ekip që keni sot para jush ka personalitete, të cilat kanë publikime në nivelet më të larta botërore. Ka prej tyre personalitete me eksperiencë të madhe në fushën e tyre, në politikë. Unë them se asnjëherë në histori një ekip si ky nuk ka pasur.

Ka një përfaqësim më të madh se asnjëherë të të rinjve dhe kjo është direktiva e Kuvendit, ka një përfaqësim të zonjave. Ka një proporcion të shkëlqyer të të gjitha potencialeve të kësaj partie. Këto zëra janë normalë, çdo njeri ka të drejtë të shprehë mendimin, ne votojmë me dy kandidatura, fshehtas dhe e them që kandidaturat e paraqitura para këshillit janë kandidaturat më të pakrahasueshme në cilësitë e tyre me të zgjedhurit e mëparshëm.

Atë e lashë të flasë, nuk i mohohet askujt. Ajo është e lirë. Ka një moment. Unë ia thashë dhe asaj, në përputhje me statutin do të gëzojë çdo të drejtë dhe po deshi të paraqesë rezolutë. Në rastin konkret, unë i kam kthyer një përgjigje sot paradite Ilirjanës për kërkesën e saj.

Nëse bëjmë gjëra jashtë statutit, nuk është kompetencë e imja. Unë kam detyrë të mos u mohoj asnjë të drejtë. Kjo është, nuk ka asgjë tjetër. Ju do ta gdhini sot këtu të prisni rezultatin? Rezultatin kjo parti e nxjerr para kamerave. Se kë votova është sekret. Referendumi i kryetarit i intereson gjithë Shqipërisë. Ai tjetri që nga 2009 e deri më sot ka ekzekutuar votën.