Shpresa-AL e Lushit rriti çmimin e biletës së urbanit në Kamëz, qytetari ankohet tek Berisha

Gjatë takimit të kreut të PD, Sali Berisha me demokratët në Kamëz, u adresuan disa probleme mes të cilave dhe problemi i shtrenjtimit të biletës së autobusit.

“Deputetët të jenë pak më të ashpër atje në parlament o doktor. Mos të na lënë vetëm ne që të çohen demokratët. Edhe ato. Ne po angazhohemi pa rrogë, pa lek, paguajmë edhe biletat e urbanit, megjithëse na e kanë ngritur këtu çmimin e biletës”.

“Mori fund aty çdo gjë. Tani u miratua nga anëtarë të këshillit bashkiak, votuan edhe demokratë. Ai ligj. Çfarë të them tjetër gjë. Me datën 10 do vijmë do marrim pjesë. Do përleshemi”, tha qytetari.

Shqetësimi i ngritur në foltore vjen disa muaj pas vendimit të Bashkisë Kamëz për shtrenjtimin e biletës së urbanit nga 40 në 50 lekë dhe rritjen e abonesë mujore nga 1200 në 1400 lekë. Ky vendim u shoqërua me akuza të forta për konflikt interesi dhe çoi në nisjen e një hetimi paraprak nga Autoriteti i Konkurrencës.

Sipas Autoritetit të Konkurrencës, hetimi u hap pas ankesave dhe reagimeve publike në media dhe ka për qëllim të analizojë funksionimin e konkurrencës në tregun e transportit urban në Kamëz. Në fokus janë linjat Kamëz–Tiranë–Kamëz dhe Paskuqan–Babrru–Tiranë, ku operator i vetëm i licencuar është shoqëria “SHPRESA – AL” SHPK, e cila mban një pozitë dominuese në treg.

Autoriteti ka theksuar se nga vlerësimi paraprak nuk rezultojnë analiza të plota ekonomike që të justifikojnë rritjen e tarifave mbi baza reale të kostove. Hetimi përfshin periudhën 1 janar – 12 dhjetor 2025 dhe synon të vlerësojë nëse ka shkelje të ligjit “Për mbrojtjen e konkurrencës”.

Dyshimet për konflikt interesi janë thelluar edhe më tej, pasi propozimi për rritjen e tarifave është bërë nga Dashnor Memaj, kryetar i Shoqatës së Transportit Urban, i cili njëkohësisht mban post drejtues në kompaninë “Shpresa.al”, përfituese direkte nga vendimi. Gjithashtu, disa anëtarë të Këshillit Bashkiak që votuan pro rezultojnë me lidhje me kompaninë, ndërsa mbledhja ku u miratua vendimi u fshi më pas nga transmetimet online, duke shtuar akuzat për mungesë transparence.

Ndërkohë, qytetarët e Kamzës vazhdojnë të shprehin pakënaqësi, duke e cilësuar rritjen e çmimit të biletës si një barrë të padrejtë ekonomike, që rëndon mbi familjet dhe punëtorët që përdorin çdo ditë transportin urban./BW/