Shqipëria, destinacioni i pestë i turizmit botëror 2016

Pasi “Rough Guide” e sugjeronte Shqipërinë si një zgjedhje ideale për të bërë plazh, kompania turistike britanike e ka përfshirë vendin e shqiponjave në listën e 10 destinacioneve më të mira për t’u vizituar në 2016-n.

Kështu, sipas saj Shqipëria renditet e pesta, pas Nepalit, Kolumbisë, Kubës, Jordanisë.

Pas Shqipërisë vijnë Rumania, Salvatori, Uellsi, Kenia dhe lista mbyllet me Sri Lankën.

Për Shqipërinë, Martin Zatko, i bashkëautor guidash thotë “Duhet t’i bëni një vizitë këtij cepi tërheqës të Europës, përpara se të fitojë popullaritetin që meriton”.

Në përshkrimin që i bëhet Shqipërisë thuhet gjithashtu: “Ndërsa vendet fqinjë Greqia dhe Kroacia kanë një turizëm të zhvilluar, Shqipëria mbetet një nga vendet më misterioze. Por, ata që do të shkojnë, do të gjejnë trashëgimi botërore të mbrojtura nga UNESCO, si qytetin antik grek të Butrintit, plazhe të praruara në bregdetin jonian, liqene madhështore malore, arkitekturë otomane dhe vendas miqësorë që ju orientojnë në drejtimin e duhur për ta zbuluar. Bëjeni këtë udhëtim përpara se bota të kuptojë se çfarë po humbet”.