Shqipëria në Panairin ITB Berlin 2026, Rama: Destinacion autentik mesdhetar që bën diferencën

Shqipëria po prezanton ofertën e saj turistike në Berlin, në një nga panairet më të mëdha të turizmit në botë, ITB Berlin 2026.

Kryeministri Edi Rama e cilësoi pjesëmarrjen në Berlin si një moment të rëndësishëm për ta pozicionuar Shqipërinë si destinacion autentik, duke theksuar se prezantimi përfshin natyrën, kulturën dhe përvojat lokale.

“Nga data 3 deri më 5 mars, Shqipëria prezantohet si destinacion autentik mesdhetar në Panairin Ndërkombëtar të Turizmit ITB Berlin, që këtë vit shënon 60-vjetorin, me një axhendë të pasur dhe një stendë të ideuar nga Ministria e Turizmit, Kulturës dhe Sportit dhe Agjencia Kombëtare e Turizmit, për të sjellë një eksperiencë që ndërthur inovacionin, kulturën, bukuritë natyrore dhe përvojat lokale, së bashku me disa bashki, 30 turoperatorë dhe biznese shqiptare” shkroi Rama në Facebook.