Seanca e 23 korrikut, e parashikuar si mbyllja e këtij sesioni parlamentar, me një rend dite prej më shumë se 30 pikash, nuk do të jetë fundi i punimeve për deputetët. Mazhoranca socialiste kishte marrë udhëzime të qëndronte në Kuvend, ndërsa arsyeja u bë e qartë pas mbledhjes së Konferencës së Kryetarëve. Deputetët do të rikthehen sërish më 30 korrik në një seancë të posaçme me vetëm dy çështje në rend dite, projektligjin për arkivat dhe atë për të drejtën e autorit.
Edhe protestuesit pritet të përshtatin planet e tyre me këtë zhvillim të ri. E konfirmuar është mbledhja e tyre në orët e para të mëngjesit të së enjtes. Skenari i protestës me hedhjen e vezëve ndaj përfaqësuesve politikë pritet të përsëritet, ndërsa edhe reagimi i mazhorancës duket se do të jetë i njëjtë.
Shqetësimi kryesor për deputetët socialistë nuk lidhet vetëm me protestën e radhës, por me takimin e së premtes, ku ata janë thirrur në një mbledhje të zgjeruar të grupit parlamentar nga kryeministri Edi Rama.
Brenda grupit socialist po qarkullon prej ditësh mundësia e ndryshimeve në kabinetin qeveritar, sidomos në një kohë kur presioni politik dhe protestat janë shtuar. Nëse do të ketë shkarkime apo emërime të reja, betimi i ministrave të rinj do të kërkonte një aktivitet parlamentar edhe gjatë muajit gusht, duke shmangur një situatë ku ministrat e larguar do të qëndronin ende zyrtarisht në detyrë.