Spaho kritika liderit të PD: Berisha është kthyer në komentues të mazhorancës. Kështu Rama rron edhe 100 vjet në pushtet

Ish-deputeti i PD-së, Edmond Spaho ka kritikuar ashpër aksionin politik të opozitës, duke ngritur pikëpyetje mbi programin, alternativat dhe strategjinë e saj përballë qeverisë. Spaho pyet nëse opozita ka një program të sajin, alternativa për shqetësimet e qytetarëve dhe aktivitet në terren, ndërsa ironizon protestat dhe konferencat për shtyp. ”Kur thua që Ramës i ka ardhur fundi dhe në shtator do të bjerë nga pushteti, a e ke menduar sesi do të bjerë, çfarë do të bësh ti, çfarë fronti do të ngresh e mobilizosh, si do t’i tundosh qytetarët? Sepse, me këto broçkulla dhe 300 spartanët çdo natë në protestë, Rama rron edhe 100 vjet në pushtet”,-shkruan Spaho.

Postimi i plotë

Ku ka katandisur opozita!

Komentuesja e maxhorancës!

Një ditë komenton për përjashtimin nga mbledhja me Ramën të Kryetares së Bashkisë Dimal.

Ditën tjetër komenton se kush nga maxhoranca nuk ka shkruar statuse kundër protestës.

Në një rast të mëparshëm na siguron se dy maune me euro janë shkarkuar nga maxhoranca në portin e Durrësit.

Maxhoranca duhet të ketë panik, tmerr dhe frikë nga opozita, por, në të vërtetë, paska nga vetja.

A ka opozita jonë program të sajin, aksion politik të sajin, alternativa të sajat për shqetësimet e qytetarëve? A ka opozita veprimtari në terren?

Kur thua që Ramës i ka ardhur fundi dhe në shtator do të bjerë nga pushteti, a e ke menduar sesi do të bjerë, çfarë do të bësh ti, çfarë fronti do të ngresh e mobilizosh, si do t’i tundosh qytetarët? Sepse, me këto broçkulla dhe 300 spartanët çdo natë në protestë, Rama rron edhe 100 vjet në pushtet.

A rrëzohet Rama nga pushteti vetëm me konferenca bajate shtypi, të cilat i kemi stërdëgjuar prej 13 vitesh dhe që nuk frymëzojnë as vetë drejtuesit e PD-së?

A zhvilloni ju sondazhe për të parë nëse ju janë shtuar apo pakësuar mbështetësit që nga zgjedhjet e vitit 2025, me modelin e luftës politike që po ndiqni?

E lodhur, e konsumuar, pa ide dhe kokëfortë për të ndryshuar, opozita po i drejtohet shtatorit, sipas shprehjes: sezon i ri politik, avaz i vjetër.