Tabaku: Rritja ekonomike për pakicën, varfëri dhe pensione të ulëta për shumicën

Reagim i deputetes demokrate, Jorida Tabaku, në rrjetet sociale:

Sistemi i dështuar që punon për pakicën!
Qeveria përpiqet çdo ditë t’u mbushë mendjen shqiptarëve se ekonomia po ecën mirë. Por pyetja është e thjeshtë: kush përfiton nga kjo rritje ekonomike?
Qeveria pretendon se nga viti 2021 deri në vitin 2025 ekonomia shqiptare është zgjeruar me mbi 24%. Por sa janë rritur pensionet gjatë këtyre katër viteve? Sa ka ndryshuar jeta e pensionistëve, përtej indeksimeve të vogla që paraqiten si dhurata të qeverisë?
E vërteta është krejt tjetër.
Sot, 27% e popullsisë në moshë pensioni po shtyhet drejt kufirit të varfërisë ekstreme.
Pensioni mesatar i pensionistëve të rinj vitin e kaluar ra në vetëm 16 mijë lekë, rreth 3% më pak se pensioni i atyre që dolën në pension në vitin 2024.
Ndërkohë, rreth 55% e 641 mijë pensionistëve trajtohen me pension të pjesshëm, me një pagesë mesatare prej vetëm 13,500 lekësh në muaj.
Pra, ekonomia mund të rritet në letrat e qeverisë, por pensionet bien, çmimet rriten dhe familjet varfërohen.
Ky nuk është thjesht një sistem i padrejtë. Është një sistem që u merr shumicës për të mbrojtur pakicën.
Një sistem që ka dëmtuar familjen shqiptare, ka zhvlerësuar punën e një jete dhe i ka kthyer pensionistët në qytetarë që luftojnë çdo muaj vetëm për të mbijetuar.
Prandaj kjo shumicë e mbron me çdo kusht këtë sistem: sepse nuk punon për shqiptarët, por për pakicën që përfiton prej tij.