Taulant Balla thirrje opozitës: Sulmet ndaj partnerëve ndërkombëtarë janë të papranueshme

Kreu i grupit parlamentar të PS-së, Taulant Balla i bën thirrje opozitës në Kuvend të mbështesë projektligjet për përafrimin e legjislacionit me Bashkimin Europian, duke kritikuar atë që e cilësoi si qëndrim me “dy standarde” mes deklarimeve në Bruksel dhe votimeve në Tiranë.

”Kur bëhet fjalë për ligjet e integrimit, duhet të ketë koherencë mes asaj që thuhet në Bruksel dhe asaj që bëhet në Kuvend”, u shpreh Balla. Në fjalën e tij, ai kritikoi gjithashtu retorikën e disa përfaqësuesve të opozitës ndaj partnerëve ndërkombëtarë, duke e cilësuar të papranueshme sulmin ndaj zyrtarëve europianë dhe drejtuesve të vendeve aleate.

Balla vlerësoi mbështetjen e partnerëve ndërkombëtarë për Shqipërinë dhe nënvizoi se vendi gëzon aktualisht një nivel të lartë respekti në arenën ndërkombëtare, si dhe një përputhje të plotë të politikës së jashtme me atë të Bashkimi Europian. Ai shtoi se momentet kyçe për vendin kërkojnë bashkëpunim politik, duke theksuar rëndësinë e miratimit të ligjeve që lidhen me procesin e integrimit dhe forcimin e marrëdhënieve me aleatët ndërkombëtarë.