Të shtunën protesta e madhe, mesazhi i protestuesit: Presim diasporën për të rrëzuar regjimin

Të shtunën pritet të zhvillohet një protestë e madhe, ku krahas qytetarëve pritet të ketë edhe pjesëmarrje nga diaspora shqiptare. Një prej protestuesve deklaroi se shqiptarët që jetojnë jashtë vendit do të priten krahëhapur, ndërsa theksoi vendosmërinë e protestuesve për të vijuar rezistencën deri në rrëzimin e qeverisë.

“Të ikë kryeministri dhe gjithë qeveria. Ne e kemi ndarë mendjen: ose ne në Shqipëri, ose Edi Rama në Kryeministri. Të dyja nuk shkojnë bashkë”, u shpreh ai.

Protestuesi tha se qytetarët janë mbledhur për të kundërshtuar atë që e cilësoi si një regjim kriminal dhe për të mbrojtur vendin. “Ne jemi këtu sepse e kemi vendosur se nuk shitet Shqipëria. Presim diasporën krahëhapur dhe do ta rrëzojmë këtë regjim kriminal”, deklaroi protestuesi.

Ai iu drejtua gjithashtu shqiptarëve në diasporë, duke i ftuar t’i bashkohen protestës dhe autokolonës drejt Shqipërisë. “Ju bëj thirrje të gjithë shqiptarëve në diasporë, i bëjmë thirrje që të bashkohen me këtë autokolonë, që të shpëtojmë të gjithë bashkë Shqipërinë”, tha ai.

Sipas protestuesit, pas 103 ditësh rezistencë, pjesëmarrja në protesta pritet të rritet edhe më tej. “103 ditë rezistencë, do të bëhemi akoma më shumë. Ne nuk do të largohemi derisa ta rrëzojmë Ramën dhe regjimin”, përfundoi ai.