Tensione janë shënuar këtë të premte në ambientet jashtë Kuvendit, ku deputeti socialist Erion Braçe u përball me protestues nga Memaliaj, të cilët janë kundër bashkimit me Tepelenën. Në momentin kur po largohej nga Kuvendi, Braçe iu afrua protestuesve, të cilët e pritën me fishkëllima dhe thirrje. Situata u tensionua më tej kur në drejtim të deputetit u hodh ujë, u godit me tabelë dhe shtyrë.
Braçe reagoi duke iu drejtuar personit që i hodhi ujin, duke shkaktuar një përplasje të shkurtër mes palëve. Ndërhyrja e policisë shmangu përshkallëzimin e situatës, ndërsa një prej protestuesve u mbajt nga personat përreth.
Në mes të tensioneve ndërhyri edhe deputeti demokrat Tritan Shehu, i cili u afrua për të qetësuar situatën. Pavarësisht ndërhyrjeve, shkëmbimet verbale mes Braçes dhe protestuesve vijuan për disa çaste. Protesta lidhet me kundërshtimin e banorëve të Memaliajt ndaj ndryshimit të propozuar të ndarjes territoriale dhe bashkimit me Tepelenën.
