Tremujori i dytë i 2016-tës, volumi i shitjeve me pakicë rritet me 6,2 %

Në tremujorin e dytë 2016, volume i shitjeve në Tregtinë me Pakicë është rritur 6,2 % krahasuar me të njëjtën periudhë të vitit të shkuar. INSTAT ka publikuar të dhënat mbi tregtinë me pakicë, sipas të cilit në grupin “Ushqime, pije, duhan”, indeksi i volumit të shitjeve është rritur 9,6 % krahasuar me të njëjtin tremujor të vitit 2015.

Për grupin e “Produkteve jo-ushqimore, përjashtuar karburantet, indeksi I shitjeve është rritur në nivelin 11,5 % kundrejt të njëjtës periudhë të vitit paraardhës, duke dhënë kontributin kryesor në këtë rritje.

Në grupin “Tregti Hidrokarburesh “, indeksi i volumit të shitjeve është ulur 1,2 % krahasuar me të njëjtin tremujor të vitit 2015, dhe është rritur 15 % krahasuar me tremujorin paraardhës. E zhveshur nga treguesit e ulët të tregut të hidrokarbureve, indeksi I shitjeve me pakicë ka pësuar një rritje prej 10,9 % kundrejt të njëjtit tremujor të vitit të mëparshëm.

Rritja e tregtisë me pakicë reflekton rritjen e konsumit gjatë muajve të fundit. Sipas të dhënave zyrtare dy tremujorët e fundit të vitit 2015 kanë shënuar rritje të konsumi, trend që ka vijuar edhe në gjatë fazës së parë të vitit 2016.