Trump thotë se po dërgon një “anije të madhe spitalore” në Groenlandë

Presidenti i SHBA-së, Donald Trump, njoftoi të shtunën se po dërgonte një anije spitalore në Groenlandë, një territor danez gjysmë-autonom. Ai deklaroi se anija do të trajtonte shumë njerëz “të sëmurë” në ishull. Trump nuk dha detaje shtesë se kujt i referohej apo numrin e personave që do të ndihmonte anija. “Ne do të dërgojmë një anije të madhe spitalore në Groenlandë për t’u kujdesur për shumë njerëz që janë të sëmurë dhe nuk po marrin kujdes atje,” shkroi Trump në platformën e tij Truth Social, duke shtuar: “Është rrugës!!!”. Ai theksoi gjithashtu se po punonte me Guvernatorin e Luizianës, Jeff Landry, për dërgimin e anijes spitalore. Landry ishte emëruar nga presidenti amerikan si i dërguari i tij në Groenlandë në dhjetor.

Mbeti e paqartë nëse anija ishte kërkuar nga Danimarka apo Groenlanda dhe cilët njerëz të sëmurë kishin nevojë për ndihmë. Postimi i Trump erdhi pasi Komanda e Përbashkët Arktike e Danimarkës njoftoi se kishte evakuuar një anëtar të ekuipazhit të një nëndetëseje amerikane, i cili kërkonte kujdes mjekësor urgjent. Nënndetësja ndodhej në ujërat e Groenlandës, shtatë milje detare jashtë kryeqytetit Nuuk, dhe nuk ishte e qartë nëse postimi i Trump ishte i lidhur në ndonjë mënyrë me evakuimin.

Megjithatë, ky njoftim fiton rëndësi mes një përçarjeje të thellë midis administratës Trump dhe Evropës mbi kontrollin e territorit. Groenlanda, ishulli më i madh në botë, është një territor Arktik i pasur me minerale dhe me rëndësi strategjike. Ajo është vetëqeverisëse, por mbetet pjesë e Mbretërisë së Danimarkës. Trump ka deklaruar se ishulli është thelbësor për sigurinë kombëtare të SHBA-së dhe se ai dëshiron ta blejë atë, madje duke kërcënuar se do ta merrte me forcë nëse ishte e nevojshme.

Retorika e tij ka rritur tensionet midis Uashingtonit dhe aleatëve të tij evropianë të NATO-s. Groenlanda, Danimarka dhe SHBA-ja janë përfshirë në bisedime për të zgjidhur situatën. Trump i zbuti kërcënimet e tij pasi arriti një marrëveshje “kornizë” me shefin e NATO-s, Mark Rutte, për të siguruar një ndikim më të madh të SHBA-së mbi Groenlandën.

Më herët këtë javë, Mbreti Frederik X i Danimarkës vizitoi Groenlandën. Kjo ishte vizita e tij e dytë në ishull brenda një viti, një përpjekje për të demonstruar unitet me territorin përballë shtytjes së Trump për të fituar kontrollin e ishullit të gjerë.