Turi ballkanik i presidentit të Këshillit Europian, Antonio Costa viziton Tiranën më 2 qershor

Përpara mbajtjes së Samitit mes Bashkimit Europian dhe vendeve të Ballkanit Perëndimor, Presidenti i Këshillit Europian, Antonio Costa do zhvillojë një tur takimesh në kryeqytetet e rajonit, me fokus forcimin e bashkëpunimit politik dhe procesin e integrimit europian të vendeve të Ballkanit Perëndimor.

Vizita zyrtare do të nisë të hënën në Sarajevë, ku Costa pritet të takohet me drejtuesit më të lartë të Bosnje-Hercegovinës për të diskutuar mbi zhvillimet politike, reformat dhe perspektivën europiane të vendit.

Në Tiranë, Presidenti i Këshillit Europian do të mbërrijë të martën, më 2 qershor, ku pritet të zhvillojë takime me autoritetet shqiptare. Në qendër të bisedimeve do të jenë avancimi i negociatave për anëtarësim në Bashkimin Europian, bashkëpunimi rajonal, si edhe çështjet e sigurisë dhe ekonomisë.

Turi diplomatik do të përmbyllet më 4 qershor në Tivar të Malit të Zi. Vizita vlerësohet si një sinjal i angazhimit të Bashkimit Europian ndaj rajonit dhe mbështetjes për vazhdimin e reformave integruese në vendet e Ballkanit Perëndimor.