Urdhri i Transporteve: Makinat me timon anglez mund të regjistrohen

Ministria e Transportit dhe Infrastrukturës njofton me anë të një urdhërese, se i ka dhënë zgjidhje problemit të automjeteve që kanë sistemin e drejtimit në krahun e djathtë (timon anglez).

Kështu, të gjithë drejtuesit me urdhëresën e re, kanë mundësinë që t’i regjistrojnë automjetet në fjalë, teksa aktualisht Kodi Rrugor ekzsitues e ndalon diçka të tillë.

Ndërkaq, MTI u bën thirrje gjithë individëve dhe subjekteve që zotërojnë mjete, të cilave u është ndryshuar kahu i sistemit të drejtimit, se duhet t’u adresohen distributorëve ligjorë të mjeteve, për të kryer kontrolle të sistemeve dhe pajisjeve të mjeteve të tyre si më poshtë:

1-Sistemi drejtimit.

2-Pasqyrat e shikimit prapa.

3-Fenerët përpara.

4-Dritat e mjegullës nga pas.

5-Fshirëset e xhamit të përparmë.

Vetëm nëse i kalon me sukses këto kontrolle, atëherë bashkë me dokumentacionin shoqërues zotëruesit e këtyre mjeteve, paraqiten në Drejtorinë e Transportit Rrugor për regjistrim. Kurse kontrolli për një periudhë tranzitore do të bëhet nga distributorët ligjorë të makinave.