VIDEO/ Denoncimi nga Berisha: Në urgjencat e spitaleve të Tiranës nuk rezulton asnjë polic i lënduar

Kreu i PD-së, Sali Berisha akuzon duke thënë se Ministria e Brendshme ka dezinformuar publikun lidhur me numrin dhe gjendjen e policëve të raportuar si të plagosur gjatë protestës së zhvilluar para parlamentit. Berisha theksoi edhe se Ministria ka përdorur informacion të rremë për të justifikuar përdorimin e forcës nga policia ndaj protestuesve.

Postimi i plotë

Mashtrim publik i Ministrisë së Brendshme! Në urgjencat e spitaleve të Tiranës nuk rezulton asnjë polic i lënduar!

Të dashur miq, në një mashtrim të shpifur publik, Ministria e Brendshme, për të përligjur dhunën e egër, lëndët toksike, gazin lotsjellës, sprajin e ariut, topat e ujit, shkelmat në kokë, zvarritjet shtazore, torturat në makinat e policisë të protestuesve paqësorë, mashtroi publikisht duke dezinformuar publikun me komunikata për shumë policë të plagosur, pa dhënë asnjë emër dhe asnjë specifikim për llojin e plagëve.

Pas interesit nga departamenti përkatës i Partisë Demokratike pranë urgjencave të institucioneve mjekësore rezulton se, nga dreka, janë dërguar për të simuluar plagosje disa policë, të cilët nuk paraqisnin asnjë plagosje, madje as edhe lëndime të përfillshme, dhe janë larguar ashtu siç i sollën, pa asnjë problem shëndetësor!

Në videon më sipër të shpërndarë nga policia, në kuadrin e mashtrimit të ulët publik, paraqitet inspektori Gjoka, i plagosur i policisë, i cili pas 20 minutash rikthehet në aksione brutale kundër protestuesve. Dënoj me forcën më të madhe këto akte të rënda të mashtrimit publik të narkopolicisë si një vepër penale të rëndë dhe dhunën çnjerëzore që u ushtrua ndaj protestuesve paqësorë.