VIDEO/ Rama bën homazhe në varrin e Papa Françeskut: Mik i paharruar i Shqipërisë dhe i familjes sonë

Kryeministri Edi Rama i shoqëruar nga bashkëshortja Linda Rama dhe djali i tyre Zaho Rama, kanë zhvilluar homazhe në varrin e Papa Françeskut gjatë vizitës në Selinë e Shenjtë. Përmes një mesazhi në Facebook, kreu i qeverisë e ka cilësuar Papa Françeskun si një mik të paharruar të Shqipërisë dhe të familjes së tij.

Po ashtu kryeministri thotë se Ati i Shenjtë nuk harronte kurrë të lutej për popullin shqiptar dhe të dërgonte vazhdimisht mesazhe miqësie dhe solidariteti. Sipas Ramës, ky homazh përbënte një çast të veçantë dhe domethënës të vizitës në Vatikan.

”Homazhi në varrin e Papa Françeskut, mik i paharruar i Shqipërisë dhe i familjes sonë, që nuk harronte kurrë të lutej për popullin tonë e të na dërgonte mesazhet e tij të miqësisë, ishte një çast i veçantë i vizitës në Selinë e Shenjtë”,-shkruan Rama.