VIDEO/ Taulant Balla inspekton plazhin e Spillesë: Sezoni turistik nis me kapacitete të plota

Kreu i grupit parlamentar i PS-së dhe drejtuesi politik për qarkun e Tiranës, Taulant Balla, inspektoi plazhin e Spillew në kuadër të nisjes së sezonit turistik veror. Gjatë vizitës, Balla u njoh nga operatorët turistikë dhe përfaqësuesit vendorë me masat e marra për mbarëvajtjen e sezonit, si dhe me kapacitetet që ofron zona bregdetare e Spillesë për pushuesit vendas dhe të huaj.

Balla theksoi se Spilleja mbetet një nga destinacionet më të frekuentuara të bregdetit shqiptar, falë vijës së gjatë ranore, pastërtisë së detit, mikpritjes dhe shërbimeve turistike. ”Deti dhe rëra e pastër, mikpritja dhe ushqimi cilësor ju presin për pushime të bukura. Merrni familjen dhe miqtë dhe ejani të shijoni pushimet e verës në plazhin e mrekullueshëm të Spillesë”, u shpreh ai.

Në zonën e Spillesë operojnë dhjetëra subjekte turistike dhe shërbimi, të shpërndara përgjatë vijës bregdetare prej disa kilometrash, duke ofruar hapësira akomoduese, bare, restorante dhe shërbime për pushuesit. Autoritetet vendore kanë marrë masa për administrimin e hapësirave publike, menaxhimin e parkimeve dhe garantimin e pastërtisë gjatë gjithë sezonit veror.